Në njoftimin e radhës përcjellë publikut për ditët e vizitës së tij në Gjermani, kreu demokrat Basha thotë se është takuar me dy emra zyrtarësh të fokusit ekonomik.
Sipas Bashës, me ta është diskutuar mundësia e investimeve të fuqishme gjermane në ekonominë shqiptare, gjithnjë kur PD të rikthehet në qeverisje.
“Pata nderin dhe kënaqësinë të takoj dhe uroj për zgjedhjen si Presidente e Këshillit Ekonomik Gjerman zonjën Astrid Hamker dhe zëvendës Presidentin Friedrich Merz, njëkohësisht CEO i BlackRock Inc, Fondit më të madh të investimeve në botë.
“Gjeta mbështetje të plotë për të na asistuar me ekspertë dhe eksperiencën e tyre gjatë detajimit të programit tonë ekonomik dhe nesër në qeverisje për të nxitur investitorët gjermanë të shqyrtojnë Shqipërinë si destinacion të investimeve të tyre.
Ne do të ngremë grupe të përbashkëta pune me qëllim bërjen realitet të objektivit tonë për ta bërë Shqipërinë një vend tërheqës për investimet gjermane në vecanti dhe të huaja në përgjithësi, për të rritur punësimin me paga dinjitoze dhe zhvillimin ekonomik të vendit.
Për programin ekonomik të PD dhe intensifikimin e bashkpunimit ekonomik me Gjermaninë, diskutova edhe me Thomas Bareiss, Sekretar Shteti i Parlamentit në Ministrinë Federale Gjermane për Çështje Ekonomike dhe Energjetikë dhe me Dr. Jürgen FRIEDRICH, President dhe drejtor ekzekutiv i Germany Trade&Invest, korporata federale për nxitjen dhe mbështetjen e investimeve gjermane në botë. I njoha me programin tonë për taksën e sheshtë 9%, me paketen anti-oligarki dhe anti-korrupsion që do të rrisë konkurrencën e ndershme dhe luftojë korrupsionin e përhapur kudo”, shprehet ndër të tjera Basha. /tesheshi.com/
