Kreu i PD-së, Lulzim Basha ka shfrytëzuar një fjalim në samitin e Partive Popullore Europiane që po mbahet në Maltë (e djathta e kontinentit), për të sulmuar ashpër qeverinë Rama dhe për ta proklamuar dhe njëherë me forcë se nuk do të tërhiqet nga kërkesa për qeveri teknike.
“Shqipëria është vendi i parë për prodhimin e marijuanës. Në 75% të territorit janë kultivuar dhjetëra parcela droge. Parcelat e drogës ruhen me persona të armatosur. Trafiku i drogës sjell të ardhura të shumta. Kjo është përgjegjësia e qeverisë, pasi është bashkëpunëtore me krimin”, tha Basha, duke ndjekur pra të njëjtën linjë në gjykimin e tij politik se droga mund, ose sipas tij do t’i blejë me patjetër zgjedhjet.
“Qeveria po kërkon të manipulojë zgjedhjet. Nuk pranojnë votimin e numërimin elektronik. Shqiptarët ju bashkuan protestës në 18 shkurt. Beteja jonë për zgjedhje të lira do të vazhdojë”, theksoi kreu demokrat. Ndërkohë, nga PPE deri më tani nuk ka asnjë qëndrim lidhur me protestën e pazakontë të PD-së në Shqipëri.
E vetmja mbështetje që i është dhënë Bashës, edhe brenda PPE-së, është ajo e kryeministrin e Hungarisë, Viktor Orban, njeri pa peshën e duhur në zhvillimet shqiptare, dhe për më tepër problematik për vetë Brukselin. /tesheshi.com/
