Kreu i Partisë Demokratike. Lulzim Basha, i pranishëm në një aktivitet elektoral në Durrës, është shprehur përpara qytetarëve se më 21 qershor do të ndalin të keqen duke zgjedhur ofertën më të mirë.
“Më 21 qershor japim mesazhin e ndaljes së të keqes, ndalja e varfërisë dhe marshimit të saj, duke zgjedhur e përqafuar ofertën më të mirë. Për një muaj, opozita ka shpalosur ofertën e saj, e cila përbëhet nga një ekip i shkëlqyer kandidatësh. Nuk kemi folur në asnjë çast për interesa të ngushta politike. Kemi ngritur zërin kundër rritjes së taksave, kundër rritjes së çmimit të energjisë. Kemi përfaqësuar interesat tuaja dhe kemi dorëzuar në parlament amendamentet tona, që kanë pasur si qëllim të ofrojnë një zgjidhje, një mundësi edhe port dyshen Rama-Meta për të mbajtur premtimet e tyre”,- tha Basha.
Ai shtoi se fillimisht opozita dëshiroi dhe uroi që kjo dyshe të kishte sukses me premtimin e tyre për 300 mijë vende pune, pasi interesi i opozitës është ai i qytetarëve shqiptarë, por, siç tha Basha, Shqipëria është zhytur në papunësi të thellë.
“Sot vetëm oligarkia jeton më mirë, asnjë shqiptar. Ky është drejtimi i duhur? Më 21 qershor kartonat nuk i ka Edi Rama e Ilir Meta por i keni ju, i kemi ne. Ju ftoj që më 21 qershor ti bashkojmë këto kartona në një votë plebishitare me mesazhe për ti dhënë dënimin e merituar kësaj qeverie”,- u shpreh kreu i PD-së në qytetin e Durrësit.
Ai deklaroi se platforma që opozita ofron është për punë dhe dinjitet për shqiptarët. “Do të jetë përballja me popullin sovran për qeverinë deri në fund, nëse nuk pranon këtë platformë”,- tha Basha./tesheshi.com/
