Lulzim Basha e ka ndarë dilemën e opozitës nga Uashingtoni.
Kreu i PD-së, i cili ndodhet për një vizitë zyrtare në SHBA ka deklaruar se opozita do ta votojë reformën në drejtësi.
Siç duket kjo vizitë i ka shërbyer kreut demokrat, ta shpallë më lehtë qëndrimin e opozitës pas disa zikzagesh dhe deklaratash kundërshtuese për reformën në drejtësi.
Siç njofton zyra e shtypit e Partisë Demokratike, Basha deklaroi: “dilema nuk është reformë në drejtësi apo zgjedhje të parakohshme. Edhe reformë në drejtësi edhe zgjedhje të lira e të ndershme. Ky është mesazhi që dua të ndaj sot nga Uashingtoni dhe për të cilën kam marrë mbështetjen e plotë dhe të gjithanshme të partnerëve tanë dhe të përfaqësuesve të tyre në Kongresin Amerikan”.
Kreu i Partisë Demokratike është takuar me zyrtarë të Shtëpisë së Bardhë, Kreun e zyrës për Ballkanin në Departamentin e Shtetit por edhe me disa kongresmenë.
Drejtori për Ballkanin në Departamentin Amerikan të Shtetit, Thomas Yazdgerdi, në takimin me zotin Basha ka mbështetur iniciativën e Partisë Demokratike për dialog dhe konsensus politik mes qeverisë dhe opozitës për të miratuar reformën në drejtësi bazuar në rekomandimet e Komisionit të Venecias. /tesheshi.com/
