Kreu i PD-së, Lulzim Basha e ka potencuar sërish Vetingun në fjalën e tij. Ai ka thënë gjatë pasdites se nuk do të ketë Veting me një qeveri krimi, duke e bërë mëse të qartë tashme se opozita nuk do jetë e gatshme ta votojë atë. Kjo vjen në një kohë kur faktori ndërkombëtar po shton deklarimet pro-Vetingut.
“Edhe nëse do të zgjidheshin gjyqtarë të ndershëm, do të ishin në shënjestrën e mafies së tyre. Kjo nuk do ishte drejtësi. Sot, nga ky shesh i lirisë, lëvizja jonë popullore është shpresa e vetme për demokracinë dhe drejtësinë në vend. Nuk ka vetting me narkotrafikantë në pushtet. Drejtësia do të vijë kur të jetë hapur rruga për zgjedhje të lira e të ndershme”, tha Basha.
“Kush u thotë shqiptarëve se mund të ketë Veting nga një qeveri e bërë njësh me bandat, është ose naiv ose nuk ia do të mirën Shqipërisë”, theksoi më tej kreu i PD-së.
Për mazhorancën, protesta e opozitës nuk ka qëllim tjetër veçse të bllokojë Vetingun, ndërsa kjo e fundit e ka kushtëzuar atë me largimin e qeverisë Rama dhe zëvëndësimin e saj me qeveri teknike, si kusht për zgjedhje të lira. /tesheshi.com/
