Kryetari i partisë Demokratike, Lulzim Basha akuzoi kryeministrin Rama se krijon klimë që inkurajon kriminelët të sulmojnë gazetarët. Ai tha se fjalimi i Ramës, një ditë më parë, në aktivitetin për Ditët e Medias, kundër gazetarëve është një fjalim kriminel.
“Njeriu që ka thurur vetëm lavde dhe përkëdheli për Elvis Roshin, Saimir Tahirin dhe kriminelët e tjerë më të cilët rrethohet, duhet të ndalë menjëherë gjuhën e tij të rrezikshme”, shkruan Basha në një postim në Facebook.
Kryeministri Rama ka përdorur po Facebook-un për t’iu përgjigjur Bashës, të cilin madje nuk e thërret as me emrin e plotë.
“LB ishe ti apo isha unë në Çadër, kur ulërije “të gjitha mediat janë të kapura nga droga përveç një kanali tv”, të cilin ia rekomandoje publikut si burim të kulluar?! Unë kurrë s’e kam imagjinuar, jo më ta them një veshëgjatllëk të tillë. Eshtë thjesht shpifje!”, shkruan Rama.
Ai i bën thirrje Bashës të kërkojë falje të menjëhershme për të gjitha mediat që sipas tij, i kriminalizoi me baltën e çadrës për muaj të tërë. /tesheshi.com/
