Kreu i një prej dy gjysmave të PD-së, asaj zyrtare, Lulzim Basha, u shfaq në publik me një stil të ri floku, kthyer në anën tjetër ndryshe nga ç’i ka patur deri më tani, duke u dukur më i ri. Veç kësaj, risi e tij në një konferencë për media ka qenë fakti se një amendament i tij në Këshillin E Europës mbi sekuestrimin e aseteve ruse jashtë Rusisë, ka marrë “ok”.
“Me to, siç është hedhur ideja, do rindërtohet Ukraina. Çfarë ka të bëjë ky konflikt me Shqipërinë dhe interesin tonë si shqiptarë? Ka të bëjë sepse mesazhi që dërgohet nuk i dërgohet vetëm Putinit apo agresorëve në këto dy qendra të tjera të konflikteve botërore, por edhe një tjetër vatër të nxehtë siç është Ballkani Perëndimor, kur në shtator të vitit të kaluar u tentua e njëjta gjë ndonëse me volume të ndryshme siç po tentohet në Ukrainë tani apo edhe më parë gjatë pushtimit të Krimesë në 2014”, tha Basha.
Ai komentoi dhe zhvillimet e fundit me SPAK-un në qendër, i cili përfshiu në goditje dhe Berishën e paprekshëm deri më tani, duke e çuar në arrest shtëpie.
“Kush ka panik nga hetimet e SPAK-ut, ja shtoftë Zoti panikun”, theksoi ai. /tesheshi.com/
