Kreu demokrat Basha është mjaftuar të mos sulmojë qeverinë por vetëm kaq. Ai ka refuzuar ftesën e Ramës për t’u ulur së bashku në shërbim të njerëzve këto orë të vështira, duke zgjedhur gjithsesi fjalë të buta për ta bërë këtë. Në përgjigjen e tij pas një interesimi gazetaresk, Basha përcolli faktin se ai e ka përkthyer politikisht ftesën e Ramës.
“Tani nuk është koha as për politikë, as për propagandë. Gjëja e vetme me të cilën po merremi ne, është të jemi afër njerëzve dhe kjo është ajo që duhet të bëjë çdokush tjetër”, tha Basha, duke mos dhënë shenja të një afrimi më të madh me Ramën, në emër të një solidariteti të nevojshëm. Komentet e tij u bënë nga Shkozeti, ku tha se ka një çorganizim në menaxhimin e ndihmave.
“Ndonjërit që i është ofruar ndonjë mundësi për t;u strehuar larg prej këtej, faktikisht, nuk i është dhënë asnjë zgjidhje për vendin e punës që mund ta ketë në drejtim te kundërt me atë që i është ofruar për strehim. Pjesa tjetër që me shqetëson shumë është mungesa totale e një koordinimi për t’u dhënë strehë dhe për t’i pajisur me ushqime, me batanije. Në një vend me thanë se ‘na kanë dhënë miell dhe patate, por mielli dhe patatet nuk hyjnë në punë, sepse ne jemi jashtë shtëpive.’ Pra, duket qartë që ka një ç’organizim total, kaos total dhe, për fat të keq, këtë po e vuajnë banorët, të cilët, unë po u jap zë shqetësimeve që m’i thanë mua, por ju i keni këtu, mund t’i pyesni edhe vetë”, tha kreu demokrat. /tesheshi.com/
