Gerti Bogdani, kreu i marrëdhënieve me jashtë në PD i ka kërkuar BE-së të hapë negociatat me Shqipërinë.
Bogdani, i cili në zgjedhjet e fundit nuk u kandidua për deputet, gjithsesi ende është Sekretar Ndërkombëtar i PD-së dhe në Asamblenë Politike të Partive Popullore ka përfaqësuar qëndrimin politik të Lulzim Bashës.
Pas takimit madje PD-ja ka shpërndarë një njoftim për shtyp, ku zyrtarisht thuhet se është kërkuar hapja e negociatave në samitin e Sofjes.
Sipas njoftimit të shpërndarë nga selia blu, “Bogdani rikonfirmoi qëndrimin e PD për mbështetjen e hapjes së negociatave të anëtarësimit, duke argumentuar se sa më afër integrimit në Bashkimin Europian të jetë Shqipëria, aq më shumë llogaridhënie dhe mbajtje përgjegjësie do të ketë për qeverinë”.
Ndërkaq, ish-deputeti i opozitës ka ngritur në Bruksel edhe çështjen e arrestimeve të protestuesve në Kukës.
Sipas njoftimit të PD-së: “Ai u kërkoi vendeve anëtare të Bashkimit Europian të mos mbyllin sytë dhe veshët ndaj situatës në Shqipëri.
Bogdani theksoi se liritë dhe të drejtat e njeriut në Shqipëri janë përkeqësuar ndjeshëm.
Dhe se ekonomia është përqendruar në duart e disa oligarkëve, klientë të qeverisë.
Bogdani përmendi kontratën koncesionare të Rrugës së Kombit.
Ai deklaroi se taksat e larta ishin arsyeja përse banorët e Kukësit u ngritën në protestë të bashkuar, pa dallime”.
/tesheshi.com/
