Në ditën e nëntë të protestës në bulevard, Basha ka sjellë në çadër për të mbështetur kërkesën për zgjedhje të lira e të ndershme, edhe përfaqësues të partive popullore europiane, mes të cilëve edhe përfaqësuesi i CDU-së, Paule Ziemak.
Duke folur para protestuesve, ai theksoi se zgjedhjet e lira dhe të ndershme janë shumë të rëndësishme për të ardhmen e vendit.
“Ju e dini që Gjermania ka qenë e ndarë në dy pjesë përmes një muri. Dhe shumë vetë mendonin se nuk ka për të pasur më ndryshime, kështu do të mbetej situata. Ndërkohë që kishte edhe njerëz të tjerë si ju që menduan se mund t’i ndryshojnë gjërat me paqe”, tha ai.
“Në vitin 1989, muri i Berlinit u rrëzua dhe Evropa Lindore u çlirua, ndërsa tani ne përballemi me sfida të reja, veçanërisht në Shqipëri, dhe tani është momenti juaj, është koha juaj që ju të merrni në dorë të ardhmen e vendit tuaj. Dhe ju duhet të bëni pyetje vetes, familjes tuaj; çfarë lloj të ardhmeje doni të keni për Shqipërinë?”, shtoi përfaqësuesi i CDU-së, partisë së kancelares Merkel, duke vijuar me thirrjen për të mbështetur Bashën në zgjedhje. /tesheshi.com/
