Kryedemokrati Basha jua ka lënë ndërkombëtarëve meritën e arrestimeve të disa bandave e jo ministrit Xhafaj të dorëhequr së fundi. Në një takim me banorë të Manzës në Durrës, njeriu në krye të opozitës është përpjekur për ta parë me konspiracion aktin e largimit vullnetar të Xhafajt në kulmin e një vale goditjeje ndaj krimit.
“Ai u largua nga frika e përballjes me hetimin. Xhafaj përballej me përgjegjësinë e përfshirjes në manipulimin e një dosjeje hetimore, për t’i bërë bisht dosjes së vëllait të tij Agron Xhafaj”, ishte argumenti i Bashës.
Ndërsa një ditë më parë, Xhafaj tha se e sfidonte opozitën tashmë që nuk kishte asnjë post, që të vërtetonte akuzat ndaj tij. Ai tha se aktin e dorëheqjes e kishte ndërmarrë në mënyrë krejt të pavarur dhe në lirinë e tij individuale. /tesheshi.com/
