Një ngjarje politike e “çuditshme” ka ndodhur sot në Komisionin Qendror të Zgjedhjeve.
Anëtarët e KQZ-së të zgjedhur nga PD-ja dhe LSI-ja kanë votuar kundër heqjes së mandatit të kryetarit të Bashkisë së Mallakastrës, Agron Kapllanaj, i cili është dënuar me dy vjet heqje lirie dhe 200 euro gjobë në vitin 2005 për një vepër penale jo të vogël, si ajo e “falsifikimit të dokumenteve dhe përvetësimit të pasurisë” nga gjykata italiane.
Në fakt, vetë Agron Kapllanaj, këtë dënim e ka të pasqyruar vetë në formularin e dekriminalizimit.
Në vitin 2016, kur kjo çështje u rimor nga KQZ, të gjithë anëtarët dhe të PS-së e shpallën çështjen si të arkivuar pasi sipas tyre gjersa bëhet fjalë për çështje të tillë, të arkivuar pra, kjo nuk përbën problem. Po në këtë kohë KQZ trajtoi me të njëjtin standard Elvis Rroshin e Kavajës, apo deputetin Shkëlqim Selami.
Dhe pas një viti, PD i kërkon Prokurorisë së Përgjithshme të kërkojë hetime shtesë për Elvis Rroshin dhe Shkëlqim Selamin. Llalla gjen dokumentet: sipas Prokurorisë Rroshi ka qenë i arrestuar në Zvicër, kurse Shkëlqim Selami deputeti i LSI-së i kaluar me PS-në është dënuar si Kapllanaj për falsifikim.
Rroshi u arrestua, është në hetim, u largua nga drejtimi i Bashkisë së Kavajës, ndërsa Shkëlqim Selami gjithashtu la mandatin e deputetit tre muaj përpara se të mbyllej Kuvendi.
PS-ja u dërrmua politikisht nga njolla e dekriminalizimit, duke humbur bashkinë e Kavajës, që Edi Rama e konsideronte si një bastion politik tashmë. PD-ja megjithatë luftën ndaj krimit e mori si kryeçështjen politike, duke bërë aleancë të fortë edhe me LSI-në që sot drejtohet nga Monika Kryemadhi.
Në rastin “Tahiri”, opozita akuzoi mazhorancën se po pengon Prokurorinë të hetojë, megjithëse Saimir Tahirit ju hoq imuniteti për t’i kontrolluar shtëpinë, telefonin, korrespondencën etj., duke mos lënë vetëm arrestimin flagrant si opsion.
Mirëpo në këto ditë, kur opozita refuzon të gjitha argumentet për të diskutuar vetëm për lidhjen e krimit, PS-ja ka rimarrë çështjen e Agron Kapllanajt, kryetarit të bashkisë së Mallakastrës, i cili fatkeqësisht është dënuar me vendim të prerë të gjykatës italiane. Ndërsa Prokuroria e Përgjithshme, e konsideron çështjen “Kapllanaj” si të mbyllur, pasi ka kaluar 10-vjeçari i parashkrimit të krimit. Pra dosja është arkivuar. Por Agron Kapllanaj është zgjedhur në vitin 2015, pikërisht kur ishte në kufirin 10-vjeçar.
Ndoshta zoti Kapllanaj, mund të jetë vërtetë i pafajshëm, dhe ndoshta vendimi i gjykatës italiane nuk ka qenë shumë i drejtë. Ka mjaft gjasa për këtë.
Por Partia Demokratike, kur ndërmorri nismën e dekriminalizimit mori përsipër edhe rolin e puritanit, pra siç e deklaroi hartuesi i ligjit, Bylykbashi: “E di se shkelen të drejtat, por ne mendojmë se nuk duhet të ketë asnjë politikan me precedente zyrtare kriminale”.
Dhe si e tillë, PD-ja thjesht për standardin që kërkoi për Saimir Tahirin së fundmi, duhet ta kishte larguar kryebashkiakun e saj të dënuar, qoftë edhe padrejtësisht, apo edhe pse i ka mbaruar afati i dënimit.
Por shkoi akoma më tej, kur sot PS-ja në Komisionin Qendror të Zgjedhjeve ka provokuar hapur opozitën. I është kërkuar të rihapë çështjen “Kapllanaj”, meqë ai rezulton i dënuar në Itali. Ndodhi që PD-ja dhe LSI-ja bashkuan votat dhe votuan kundër, duke i dhënë Edi Ramës sot një kartë që u duk se ja kishin hequr me kohë, për të thënë se “vërtetë unë mbaja njerëz me precedent, por këta i ka edhe PD”.
Më kryesorja është se Lulzim Basha ka rrëzuar një fitore të madhe që arriti me shumë mund: atë të Kavajësm, ku jo vetëm largoi Elvis Rroshin por edhe fitoi më 25 qershor zgjedhjet për kryetarin e bashkisë së Kavajës, një aset që mund ta përdorte moralisht. Ndërsa me këtë votim në KQZ, PD-ja dhe LSI-ja i kanë dhënë Elvis Rroshit çertifikatën e pafajësisë.
Rroshi u largua nga kryebashkiak se kishte marrë një dënim si minoren, kur ishte në një kamp refugjatësh. Kurse Agron Kappllanaj, një zyrtar i PD-së rri në detyrë edhe pse është dënuar si adult, dhe që rri duke përdorur “procedurën”. A duket se ka një ngjashmëri me dikë që sot lufton dekriminalizimin? /tesheshi.com/
