Lidhur me zhvillimet politike në vend dhe gjendjen ekonomike ku ndodhet Shqipëria, kreu i opozitës Lulzim Basha ka mbledhur gazetarët në një bashkëbisedim. Gjatë fjalës së tij, Basha u shpreh se këtë muaj gusht, opozita nuk ka asnjë ditë pushim, por do të prezantojë platformën e saj dhe do të marrë një vendim, të cilin do ta bëjë publik për të gjithë qytetarët.
Ai tha se “mazhoranca po bën gati vjedhjen dhe shkatërrimin e zgjedhjeve” dhe për të shmangur këtë duhet një qeveri teknike.
Pasi deklaroi se përsa i përket reformës në drejtësi tashmë nuk do të ketë më beteja politike, por vetëm ligjore, Basha tha se “tani nis beteja për zgjedhje të lira dhe të ndershme”.
“Kemi prezantuar platformën tonë për zgjedhje të lira dhe të ndershme në reformën e posaçme të reformës zgjedhore, por qeverisja e Edi Ramës po shteron mundësinë kohore për implementimin e platformës sonë”, u shpreh Basha.
“Po bëjnë gati vjedhjen dhe shkatërrimin e zgjedhjeve të radhës. Kjo është një vijë ndarëse që nuk kalohet. Nuk do të lejojmë prishjen e procesit të ardhshëm zgjedhor. Kushti ynë për garantimin e zgjedhjeve të lira dhe të ndershme është dhe mbetet qeveria teknike”, tha lideri opozitar. /tesheshi.com/
