Katalanasit u përballën me një valë kritikash të ashpra kur humbën thellë ndaj PSG-së në Champions League. Cikël i përfunduar, Messi i pamotivuar, kërkohet ndryshim…
Përgjigjja është dhënë në fushë nga Barcelona. Pas fitores jobindëse javën e shkuar ndaj Leganesit, ka ardhur sot një trepikësh i përmasave të mëdha ndaj Atletikos së Madridit.
Në “Vicente Calderon” u përsërit rezultati i 1 shkurtit, kur Barcelona fitonte 1-2 në gjysmëfinalen e Kupës së Mbretit.
Pas eliminimit në kupë, Barcelona u jep goditje shpresave të Atletikos për të luftuar për titullin kampion. Veç kësaj, merr vetë kryesimin e kampionatit spanjoll, në pritje të një gabimi të Realit të Madridit, që luan sonte ndaj Vilarealit në transfertë.
Duke iu rikthyer ndeshjes, pas një pjese të parë pa gola, por me epërsinë e vendasve, Rafinha do ta kalonte Barcelonën në avantazh në minutën e 64-t.
Me një skemë të njohur për Atletikon, Godin barazoi gjashtë minuta më vonë pasi e preku topin me kokë.
Lionel Messi u rishfaq në momentin e duhur, duke i dhënë epërsinë Barçës me golin e minutës së 86-të.
Kjo ishte humbja e pestë e Atletikos në 24 javë kampionat, që tani ka nëntë pikë më pak se Barcelona e vendit të parë. /tesheshi.com/
