Kupa Ndërkombëtare e Kampionëve vazhdon t’u shërbejë shumë skuadrave me emër për t’u përgatitur për sezonin e ri.
Në një takim të tillë, të luajtur mbrëmjen e së mërkurës, matën forcat Barcelona e Lestëri, përkatësisht skuadra kampione e Spanjës dhe e Anglisë.
Katalanasit qenë të papërmbajtshëm në pjesën e parë, duke kryesuar 3-0. Dy prej golave u shënuan nga Munir, kurse një prej tyre mban firmën e uruguajanit Luis Suarez.
Pjesa e dytë do të kishte për protagonist një blerje të re të Lestërit, që e la paksa në hije paraqitjen e mirë të Barcelonës. Ahmed Musa, 23-vjeçari nigerian i blerë këtë verë nga CSKA e Moskës, bëri gjithçka mundi për të rënë në sy, duke shënuar dhe dy gola për Lestërin.
Epërsia e Barcelonës do të kthehej me golin e katërt, të shënuar Rafa Mujica në minutën e 84-t.
Në një tjetër takim, por këtë herë në orët e para të së enjtes, e për më shumë në Nju Xhersi, Reali i Madridit fitoi 1-0 ndaj Bajernit të Mynihut. Goli i vetëm i takimit do të shënohej nga Danilo njëmbëdhjetë minuta para përfundimit të sfidës.
Në Minesota, Çelsi i Antonio Conte-s triumfoi 3-1 ndaj Milanit të Vincenzo Montella-s. Traore do ta kalonte Çelsin në epërsi në minutën e 24-t, por Bonaventura do të barazonte katërmbëdhjetë minuta më pas. Pjesa e dytë u përket londinezëve, që e gjejnë rrjetën dy herë të tjera me anë të Oscar-it. /tesheshi.com/
