Katalanasit nuk e kanë patur aspak të vështirë ta kalojnë pengesën e quajtur Rajo Valekano, edhe pse kanë luajtur në transfertë. Me rezultatin e thellë 1-5 ka përfunduar ndeshja e fundit e javës së njëzet e shtatë e kampionatit spanjoll.
Rakitiç do ta hapte serinë e golave për miqtë, të pasuar nga tre të tjerë të shënuar nga Lionel Messi, për të ardhur te goli i parë i turkut Arda Turan me bluzën e Barçës.
Vendasit do të përgjigjeshin thjesht me një gol nderi në minutën e 57-të, të shënuar nga Gonçalves. Veç golave të pësuar, Valekano do të luante me nëntë lojtarë në një pjesë të mirë të lojës, pas kartonave të kuq të nxjerrë për Diego Llorente-n dhe Iturra-n.
Rezultati mund të kishte qenë më tenistik nëse Luis Suarez do ta kthente në gol një penallti të gjuajtur prej tij. 11-metërshat janë shndërruar në një problem për katalanasit, që kanë humbur nëntë nga 18 të dhënët për ta në këtë sezon.
Fitorja e Barcelonës e çon në tetë pikë diferencën me ndjekësen më të afërt, Atletikon e Madridit, duke e mbajtur bindshëm kryesimin e La Liga-s. /tesheshi.com/
