Një barazim i thatë, pa gola, me pak raste, kjo është ajo çka u përcoll në takimin Norwich City – Manchester City, të luajtur sot në mesditë.
Rezultati 0-0 u jep shpresa vendasve për të mbijetuar në Premier League, por ua dërrmon shpresat udhëtuesve për të fituar kampionatin në sezonin kur do të ndahen rrugët me kilianin Pellegrini, trajnerin e skuadrës.
Ndërsa Man. City gjendet në pozita të favorshme në Champions League e thuajse është i kualifikuar për në çerekfinale, krejt tjetër është figura që po bën në Premier League. Duhet të kujtojmë faktin se vetëm dy janë fitoret për të në 11 takimet e fundit të luajtura në fushë kundërshtare.
E për të bërë një përshkrim të ndeshjes së sotme, mjafton të themi se lojtarët e Manchester City-t nuk gjuajtën qoftë edhe një top të vetëm brenda kuadratit të portës kundërshtare në pjesën e dytë.
“Jemi të zhgënjyer. U përpoqëm të jemi agresivë me dhe pa top. Lëvizëm mirë, por nuk mundëm të krijonim hapësira,” deklaroi trajneri i Manchester-it pas ndeshjes.
Rezultati i sotëm e lë Manchester City-n nëntë pikë pas Leicester City-t të vendit të parë. Pos kësaj, Man. City-t i rrezikohet seriozisht dhe vendi i katërt, ku pozicionohet aktualisht. West Ham-i i vendit të pestë ka vetëm dy pikë më pak.
Të dielën e ardhshme, Man. City pret Man. United-in, në derbin e qytetit.
Endrra për ta fituar kampionatin për herë të tretë në pesë vite duket të jetë e parealizueshme për Manchester City-n. /tesheshi.com/
