Banorët e “Astirit” kanë protestuar me zjarr gjatë orëve të mbrëmjes, duke zgjedhur të djegin goma në rrugë. Pas mesazhit të kryebashkiakut Veliaj se nuk ka kthim pas nga projekti i Unazës së Re, që pra prek shtëpitë e dhjetra banorëve që tashmë po protestojnë prej gati një jave, këta të fundit dolën dhe më të mobilizuar në rrugë.
“Kryeministër ku je fshehur?”, “Dy duar për një kokë”, “Duam pronat tona”, ishin disa nga thirrjet e tyre, shoqëruar nga djegie gomash e kazanësh.
Kujtojmë se një formë të ngjashme proteste aplikoi dhe PS në pranverë të 2011, kur KQZ anulloi një fitore të Edi Ramës në zgjedhjet për Tiranën, përballë Lulzim Bashës. Deputetë e përkrahës të saj, nisën të protestonin në rrugë duke i bllokuar ato me djegie gomash. /tesheshi.com/
