Liderët kosovarë pas votimit u kanë bërë thirrje qytetarëve të dalin masivisht për të votuar që të zgjedhin të preferuarit e tyre për kryetar komunash. Kryeministri Ramush Haradianj, njëheraz lider i AAK-së tha se qytetarët me votë vendosin vetë për fatin e tyre.
“Sot iu bëj thirrje të gjithë qytetarëve që të votojnë të vendosin për fatin e tyre. Kushdo që është fitues duhet t’i përgjigjet legjitimitetit”, tha ai.
Edhe Kadri Veseli ftoi qytetarët të dalin në zgjedhje masivisht.
“Do të uroja gjithë qytetarët e vendit për këtë ditë të zgjedhjeve. Në të njëjtën kohë i thërras në mënyrë sa më solemne , të qetë, që sa më shumë të dalin në zgjedhje, t’i përgjigjen obligimit qytetar dhe në të njëjtën kohë të votojnë për ata të cilët do të udhëheqin për katër vitet e ardhshme. Ata kanë të drejtë të dinë se kush do t’i udhëheqë. Jam i sigurt se do të dinë të votojnë ata që janë më të mirët. Le të fitojnë kryetarët më të mirë të komunave”, ka thënë Veseli.
Edhe kryetari i LDK-së, Isa Mustafa, tha se përmes votës qytetarët vendosin për çështjet themelore që i prekin ata.
“Sot është ditë e rëndësishme për të gjitha komunat pasi që po zhvillohet raundi i ditë për kryetar të komunës. Të gjithë qytetarët do të vendosin për kandidatin më të mirë, në mënyrë që ata të qeversin dhe të gjithë të jemi të kënaqur. Ata përcaktojnë fatin e shumë komunave në Kosovë”, ka thënë Mustafa.
Kryetari i Vetëvendosje-s, Visar Ymeri mesazhin e tij ia ka dedikuar konkretisht prishtinasve të cilëve u ka bërë thirrje të dalin të votojnë.
“Ftoj të gjithë qytetarët e Prishtinës që sa më masivisht të dalin në zgjedhje, duke ditur rëndësinë e pushtetit lokal. Qytetarët të bëhen bashkë që komuna e Prishtinës të vazhdojë të mirëqeveriset dhe të rritet si një qytet i qytetarëve, hapësira për ta do të jetë e domosdoshme për një jetë më të mirë”, ka thënë Ymeri.
Presidenti Thaçi me të drejtë vote në Prishtinë, nuk ka votuar për shkak se ndodhet për vizitë në Kanada. /tesheshi.com/
