Ballkani, sërish me tre kryeministra shqiptarë

Kryetari aktual i Kuvendit dhe një zyrtar i lartë i partisë bashkëqeverisëse shqiptare BDI, Talat Xhaferi, do të jetë kreu i qeverisë së përkohshme të Maqedonisë së Veriut që do të emërohet më 28 janar 2024. Vendimi është marrë të premten pasdite nga Komiteti Qendror i kësaj partie.

Sipas legjislacionit zgjedhor të Maqedonisë së Veriut, 100 ditë para mbajtjes së zgjedhjeve parlamentare, formohet Qeveria e përkohshme që do ta udhëheqë vendin deri në zgjedhjet parlamentare.

Zgjedhjet parlamentare në Maqedoninë e Veriut do të mbahen më 8 maj 2024 dhe do të përkojnë me raundin e dytë të zgjedhjeve presidenciale, i cili do të zhvillohet vetëm nëse asnjë nga kandidatët për ulësen presidenciale nuk merr më shumë se 50% në raundin e parë që do të mbahet më 24 prill 2024.

Bazuar në marrëveshjen politike ndërmjet partive bashkëqeverisëse Bashkimi Social Demokrat të udhëhequr nga kryeministri Dimitar Kovaçevski dhe BDI-së shqiptare të udhëhequr nga Ali Ahmadi, kjo qeveri e përkohshme do të drejtohet nga një person i emëruar nga partia shqiptare. Kështu, për herë të parë në historinë e vendit, që nga viti 1991 kur fitoi pavarësinë, vendi do të ketë një kryeministër shqiptar, qoftë edhe për 100 ditë. Shqiptarët përbëjnë 25% të popullsisë së Maqedonisë së Veriut.

Kujtojmë se nëse Dritan Abazoviç do vijonte të ishte kryeministër në Mal të Zi, ahere Ballkani do shkonte në katër kryeministra shqiptarë, një tregues domethënës i faktorit të fortë “të shqipes” në rajon. /tesheshi.com/