Socialisti Taulant Balla, përmes një video-mesazhi, ka tentuar të zbarthejë të ashtuquajturën “Paketa e Maleve”, një nismë e re që ka për qëllim të nxisë investimet në zonat malore, veçanërisht nga shqiptarët e diasporës.
“Shumë shkruajnë dhe duan më shumë informacion mbi Paketën e Maleve,” tha Balla. “Kjo është një politikë e re, një qasje e re e qeverisë sonë për zhvillimin e zonave malore dhe agroturizmit në to.”
Ai sqaroi se çdo qytetar që ka në zotërim një tokë ose truall për më shumë se 10 vite – edhe në mungesë të certifikatës së pronësisë – mund të përfitojë nga kjo paketë.
“Është shumë e thjeshtë: nëse ti apo familja jote keni në zotërim një tokë për një periudhë mbi dhje vite ose keni një truall që familja juaj e pretendon që është trualli që ju ka lënë gjyshi në fshat dhe këtë tokë e keni tokën e të parëve tuaj, por për këtë copë toke, për këtë truall ju nuk keni asnjë letër.
Nuk keni pasur kurrë një certifikatë pronësie. Nuk ka asnjë problem, prandaj kemi menduar Paketën e Maleve. Dhe qoftë për këtë tokën që e ke për një periudhë mbi dhjetë vite apo për këtë truallin që ta kanë lënë gjyshërit e tu. Do të shkosh në bashkinë brenda së cilës ndodhet kjo tokë. Pra, nëse ti je një banor i Malësisë së Madhe, për shembull, atëherë do shkosh tek Bashkia e Malësisë së Madhe dhe aty do të kërkosh një vërtetim nga Këshilli Bashkiak.
Pra, do të bësh një kërkesë dhe do t’i kërkosh Këshillit Bashkiak të vërtetojë që ti këtë tokë e ke në zotërim prej dhjetë vitesh apo këtë truall, është një truall që zona aty e dinë të gjithë që është një truall që i takon familjes tënde, pra është trashëguar nga gjyshërit edhe pse ti s’ke asnjë certifikatë pronësie”, tha ndër të tjera Balla.
Pas këtij hapi, institucionet shtetërore do të pajisin aplikuesit me leje për të zhvilluar ekonomi malore, si agroturizëm, ferma, pika përpunimi apo grumbullimi.
Por as Balla e as vetë Rama nuk thonë se çfarë u arrit me projektin “100 fshatrat”, një nismë e marrë me të njëjtin qëllim, atë të rivitalizimit ekonomik të zonave rurale.
Sot, pas vitesh që u ndërrmor kjo nismë, qeveria nuk ofron qoftë dhe një model të vetëm, pra një fshat të vetëm, ku projekti u zbatua me sukses të plotë. /tesheshi.com/
