Kreu i grupit parlamentar të PS-së, Taulant Balla, i është përgjigjur nga foltorja e Kuvendit akuzave të opozitës dhe kreut të PD-së, Lulzim Basha, mbi lidhjet e qeverisë me krimin, veçanërisht referuar ngjarjes së ndodhur në Elbasan.
Balla me tone të forta kërkoi që askush të mos përzihet, as me deklarata dhe as me marrje krahu të njërës apo të palës tjetër.
“Unë nuk kam folur sot, dhe nuk do të flas asnjëherë sepse personalisht dhe së bashku me mua të 7 kolegët deputetë të PS në Elbasan nuk kanë as njëlloj lidhje me asnjërin nga këta. Kujt ti djegë miza në kësulë le ti djegë.
Ne jemi këtu për të mbështetur fuqimisht një aksion të policisë, i cili duhej të merrej me kohë, që në 2005 kur filloi ngjizja e këtij konflikti, e më pas në 2009 ku zotëria nga 2009 deri në 2011 ka qënë deputet i PD-së në Elbasan dhe njëherësh ministër i brendshëm”, tha Balla, duke iu drejtuar Bashës.
Në vijim, ai kërkoi nga kreu i PD-së të mos bëjë provokime foshnjore duke ngritur pyetje pa kuptim si: ku ishe dje apo mbërëmë.
“Unë Lulzim, nuk kam bërë kurrë asnjë kontratë me kriminelë për të siguruar votën.
Dua t’ju them me shumë keqardhje për vijimësinë e një farse me sulmet tuaja personale ndaj ministrit Xhafa, e cila është e sqaruar shumë vite më parë nga vetë ai, që nuk ka asnjë lloj të vërtete ndaj shpifjeve që hidhni ndaj tij. Por kushdo që të .ishte prej nesh në vendin e Fatmir Xhafës do ta trajtonit njëlloj. Edhe sikur Jorida Tabakun ta merrnim ta vëmë ministre të Brendshme edhe ajo do të ishte koka e krimit dhe e meduzës”, tha Balla. /tesheshi.com/
