Gjysmëfinalja e parë e Euro 2016-tës është ajo mes Portugalisë dhe Uellsit, e cila do të zhvillohet pas dy ditësh, në mbrëmjen e së mërkurës.
Portugalia udhëhiqet nga Cristiano Ronaldo, kurse Uellsi e merr frymëzimin nga Gareth Bale. Të dy lojtarët janë pjesë thelbësore e Realit të Madridit në aktivitetin në klube, por në këtë takim do të luajnë si pjesë e palëve kundërshtare.
Megjithatë, Bale refuzon që ta shohë këtë si një antagonizëm mes tij dhe Ronaldo-s, edhe pse shumë është folur për një marrëdhënie jo fort të paqtë mes dy lojtarëve.
“Nuk bëhet fjalë për dy lojtarë, por për dy vende në një gjysmëfinale, 11 meshkuj kundër 11 meshkujve,” deklaron Bale, i cili ka shënuar tre gola gjatë këtij Europiani.
Ai e mohon që të ketë diçka jopozitive midis tyre, duke thënë fjalët më të mira për Ronaldo-n. “Ai është një lojtar fantastik, çdokush e di se çfarë mund të bëjë ai. Ne ia kalojmë shumë mirë në Madrid, e shijojmë të luajturit me njëri-tjetrin.”
Në anën tjetër, duke folur mbi ecurinë e Portugalisë, Ronaldo thotë, “Ne të tërë besuam që nga fillimi. Nuk erdhëm këtu për të plotësuar numrat.”
“Erdhëm këtu për të bërë një punë. Në fund fare, duam të fitojmë turneun. E dimë se jemi përsëri një hap më pranë. Duhet ta përqendrojmë gjithçka në gjysmëfinalen. Nëse e çojmë në fund punën, atëherë mund t’i hedhim sytë nga finalja.” /tesheshi.com/
