Kampionët e Turqisë u treguan tërësisht të pafuqishëm ndaj një Bajerni jo në ditët e tij më të mira. Dueli i parë gjermano-turk në Champions League u mbyll 5-0 në favor të bavarezëve, thuajse të kualifikuar për në çerekfinale.
Fati i ndeshjes në “Allianz Arena” u vendos në minutën e 16-të, me daljen e kroatit Vida me karton të kuq.
I mbetur me dhjetë lojtarë, Beshiktashi kishte gjithsesi një mundësi të mirë pak çaste më vonë. Një mundësi që nuk u shfrytëzua nga Vagner Love, që bëri të pamundurën, duke e nxjerrë topin jashtë kur më kollaj e kishte ta çonte në rrjetën e bavarezëve.
Goli i parë i Bajernit erdhi në minutën e 43-të, shënuar nga Muller.
Pjesa e dytë qe e tëra e të zotëve të shtëpisë. Coman, Muller dhe Lewandowski shënuan në këtë pjesë; dy prej golave i realizoi sulmuesi polak.
“Mbrëmje e pakëndshme në Gjermani, pesë gola dhe një karton i kuq,” është titulli i së përditshmes turke “Sabah”, kushtuar humbjes të thellë të Beshiktashit. /tesheshi.com/
