Fitorja 1-3 këtë mbrëmje ndaj Mainzit në transfertë i jep mundësi Bajernit të Mynihut të ringjitet në krye të Bundesligës së paku deri një ditë më pas.
Bavarezët kanë siguruar një fitore të çmuar, që i barazon me pikë me Lajpcigun e vendit të parë. Dy ekipet kanë nga 30 pikë, por Bajerni ka golavarazh më të mirë.
Në “Opel Arena”, skuadra vendase e Mainzit kaloi në epërsi që në minutën e katërt me anët të Cordoba-s.
Një avantazh që nuk zgjati shumë, pasi katër minuta më pas barazoi Lewandowski. Të çliruar nga ankthi i minutave të para, miqtë vazhduan të shohin nga porta kundërshtare, dhe në minutën e 21-të vjen dhe goli i Robben-it.
Polaku Lewandowski tregoi mjeshtëri në minutën e 91-të, atëherë kur ekzekutoi një goditje dënimi. Topi i gjuajtur prej tij përfundoi në rrjetën e Mainzit edhe një herë tjetër.
Bajerni do duhet të presë takimin e së shtunës, të orës 18:30, mes Lajpcigut dhe Shalkes, për të parë nëse do të vijojë të mbajë vendin e parë në klasifikimin e kampionatit gjerman në javën e 13-të të tij. /tesheshi.com/
