Skuadra bavareze, më e mira e Gjermanisë, dominuese e futbollit gjerman, nuk fiton prej 24 shtatorit. Ecuri e pamenduar për Bajernin e Mynihut, që më 28 shtator humbet 1-0 në Madrid ndaj Atletikos, më 1 tetor barazon 1-1 me Këlnin në “Allianz Arena”, e sot barazon 2-2 në transfertë ndaj Eintrahtit të Frankfurtit.
Një barazim 2-2 edhe pse e ka zotëruar lojën, edhe pse ka kaluar dy herë në epërsi, me golat e Robben-it dhe Kimmich-it, edhe pse kundërshtari ka luajtur me dhjetë lojtarë që nga minuta e 65-të.
Megjithatë, nuk duhet harruar se goli i dytë i Eintrahtit ishte në pozicion jashtë loje. Sido që kjo nuk e justifikon këtë krizë të vogël të Bajernit.
I vetmi ngushëllim mbetet fakti se Bajerni i Mynihut vazhdon ta kryesojë Bundesligën.
Përndryshe, Këlni, skuadra ku aktivizohet Mërgim Mavraj, i kthyer në titullar të padiskutueshëm, ka fituar 2-1 ndaj Ingolstadtit. Shënuesi i dy golave ka qenë Modeste, njëri prej të cilëve me 11-metërsh.
Paraqitjet e shkëlqyera të Këlnit e mbajnë atë në vend të dytë, pas Bajernit të Mynihut, me vetëm dy pikë më pak. /tesheshi.com/
