Bajerni vazhdon ta dominojë futbollin gjerman në çdo aktivitet. Kështu ka bërë dhe në Kupën e Gjermanisë, ku ka fituar lehtësisht ndaj Bohumit në çerekfinale.
Bohumi shpresonte të bënte një surprizë pasi e priste Bajernin në fushën e vet, por epërsia e skuadrës së Guardiolës ka qenë e padiskutueshme. Dy golat e polakut Levandovski dhe një i spanjollit Tiago Alkantara i dhanë fitoren Bajernit, që mund të kishte qenë më e thellë nëse Tomas Myleri do të shënonte nga pika e 11-metërshit pak para mbarimit të pjesës së parë.
Në takimin e fituar 0-3, treguesit e lojës kanë folur të tërë për Bajernin: 72 për qind qe zotërimi i topit nga bavarezët kundrejt 28 për qind të vendasve, një goditje nga këndi gjuajti Bohumi, e 11 të tillë skuadra mike, e gjashtë gjuajtje brenda kuadratit të portës patën lojtarët e Bajernit krahasuar me asnjë të pritësve të pafuqishëm.
I pritshëm në finalen e Kupës së Gjermanisë është dueli klasik mes Bajernit të Mynihut dhe Borusias së Dortmundit.
Të gjitha gjasat janë që të ngjasë kështu, me dy gjysmëfinalet që kanë vënë përballë Hertën e Berlinit me Borusian e Dortmundit dhe Bajernin e Mynihut me Verder Bremenin.
Dy takimet gjysmëfinale do të luhen më 19 prill. /tesheshi.com/
