Skuadra më e mirë dhe më përfaqësuese e futbollit gjerman nuk ka nevojë të presë më për t’iu gëzuar fitimit të titullit të gjashtë radhazi në Bundesligë.
Bajerni i Mynihut ka fituar sot 1-4 në fushën e Augsburgut, dhe me 72 pikët e grumbulluara është bërë i pakapshëm nga rivalët, edhe pse kampionati do dhe pesë javë të tjera për të arritur në fundin e tij. Shalke 04, skuadra ndjekëse më e afërt, në vend të dytë në renditje, ka vetëm 52 pikë, të pamjaftueshme për të shpresuar më tej për diçka më të mirë.
Tolisso, James Rodriguez, Robben dhe Wagner ishin shënuesit në fitoren e sotme, të arritur me një formacion me shumë ndryshime.
Bavarezët patën një fillim të keq të sezonit, por ulja e Heynckes-it 72-vjeçar në stol në tetorin e shkuar, në vend të Ancelotti-t të shkarkuar, ndryshoi gjithçka. Nga pesë pikë prapa Borusias së Dortmundit asokohe, sot Bajerni i Mynihut e siguroi titullin me një shkëputje të madhe nga pretendentët e tjerë.
Bajerni është po ashtu pranë kalimit në gjysmëfinalet e Champions League-s, ndërsa kërkon dhe suksesin në Kupën e Gjermanisë, ku në gjysmëfinale ka për kundërshtar Bajer Leverkusenin. /tesheshi.com/
