Prova laboratorike e ardhur nga Anglia lidhur me audio-përgjimin e famshëm të pagëzuar si “Babale”, ka konfirmuar fallsitetin e zërit të vëllait të ministrit ë Brendshëm Fatmir Xhafaj, Agron Xhafaj. Ai që ka luajtur rolin e këtij të fundit, sipas asaj çfarë ka hetuar e konkluduar në fund Prokuroria e Krimeve të Rënda, është Fredi Alizoti, për të cilin është lëshuar urdhër-arrest. Gjithashtu, urdhër-arrest është lëshuar dhe për Albert Veliun, ndryshe Babalja, ndërsa për gazetarin Jetmir Olldashi kërkohet detyrim paraqitjeje.
Që që kur PD prezantoi me pult në dorë audio-regjistrimin në selinë e saj, materiali u mohua kategorikisht si nga Agron Xhafaj, i cili më pas bëri menjëherë kallzim në Prokurori, e si nga i vëllai ministër, duke u pasuar nga kryeministri Edi Rama, që tha se privatisht, për të qenë ai vetë i qetë, ja kishte dërguar materialin një laboratori, prej së cilit kishte ardhur përgjigja se gjithçka ishte një manipulim.
Në reagimin e parë pas lajmit, Rama u shpreh: “Uroj që arrestimi i aktorëve të Babale 1 të jetë fillimi, jo fundi i drejtësisë mbi një maskaradë të orkestruar për të llahtarisur dynjanë e rrëzuar qeverinë!”.
Ndërsa Basha, siç dhe pritej, iu turr Prokurorisë.
“Kush priste diçka tjetër nga prokuroria Rama-Marku-Xhafa-Prela, është vetëm naiv. Agron Xhafaj që i fshihej prej 5 vitesh drejtësisë me ndihmën e vëllait, u largua me urgjencë drejt Italisë, që të mos përballej me hetimin dhe akuzat që prokuroria e kapur i quan sot montim.
Sot çdo shqiptar e kupton më qartë se kurrë pse Edi Ramës i duhej prokuroria nën komandën e tij. Me aktin e sotëm, Rama i ka vënë zjarrin shtetit ligjor. Tani nuk ka mbetur rrugë tjetër për të vënë banditët para përgjegjësisë, përveç rrëzimit me çdo mjet të mafias në pushtet”.
Ndërkohë, e njëjta gjë po vijon dhe me pretendimin tjetër të opozitës, referuar deklarimeve të policit në arrati Emiljano Nuhu, se Taulant Balla ka qenë prezent në Komisariatin e Fushë – Krujës, ku i është vënë pistoleta në kokë nga Rrajat.
Edhe për këtë rast, si Balla nominalisht e si mazhoranca, thonë se është e gjitha një mashtrim dhe për këtë arsye janë depozituar kallzime penale në gjykatë. Ndaj dhe është quajtur “Babale 2”. /tesheshi.com/
