Avokati i Popullit ka publikuar një raport në të cilin akuzon Policinë dhe Prokurorinë se kanë shkelur ligjin me ndalimin e protestuesve në Kukës, si dhe i propozon Këshillit të Lartë të Drejtësisë që kryesohet nga Ilir Meta të bëjë shkarkimet e nevojshme, edhe pse me ligj nuk e ka një gjë të tillë tani me hyrjen e reformës në drejtësi.
Avokati i Popullit, që drejtohet nga Erinda Ballanca, e propozuar nga PD-ja, dhe e cila ka qenë avokate e familjes “Basha”, ka publikuar një raport të gjatë prej 38 faqesh ku thekson se ka pasur shkelje proceduriale nga ana e Policisë së Kukësit dhe Prokurorisë.
Ndërkohë, Avokati i Popullit nuk ndalet edhe tek gjykatësja për të cilën thotë që edhe pse nuk e ka kompetencë, arrin të verifikojë se vendimi i gjyqit nuk ka shpjegim shterues.
“Nuk janë evidentuar nga ana e Prokurorisë dhe/ose Policisë veprimet konkrete të bëra midis tyre për të dokumentuar orën në të cilën i është kërkuar policisë zbatimi i këtyre urdhrave të ndalimit; Nuk rezulton asnjë dokumentim në lidhje me grupet e ngarkuara nga ana e Policise për të ekzekutuar urdhrat e ndalimit dhe ose personin përgjegjës (veprimet janë kryer me urdhra verbale), theksohet në raport.
Ky raport i Avokatit të Popullit tregon se institucioni nuk ka ndryshuar asgjë sa i takon qëndrimit për protestën në Kalimash.
Kjo pasi, titullarja e këtij institucioni, Erinda Ballanca, bëri një deklaratë vetëm pak orë pas protestës në Rrugën e Kombit duke theksuar se policia duhet të ishte vetëpërmbajtur.
Ballanca i bënte thirrje me nuanca politike qeverisë, që të mos merrte vendime që sipas saj mund ta shtynin popullin drejt dhunës.
Ndërsa lidhur me dhunën e ushtruar nga disa protestuesit, Ballanca është mjaftuar të thotë se protesta është e drejtë e kujtdo, porse ajo nuk duhet tejkaluar në dhunë në asnjë rast.
Avokatja e Popullit, Erinda Ballanca ka qenë avokatja e vjehrrit të Lulzim Bashës në gjyqin në Gjykatën e Strasburgut për shembjen e pallatit në Vlorë nga ana e qeverisë.
Në të kaluarën Ballanca ka qenë avokate e Sali Berishës në një gjyq për shpifje. /tesheshi.com/
