Ndërsa të enjten do të shqyrtohet kërkesa e Serbisë nga autoritetet franceze lidhur me ekstradimin e Ramush Haradinajt, avokati Arianit Koçi, shprehet i bindur se lideri i AAK-së do të lirohet përfundimisht.
Ai thotë se kërkesa e Serbisë është politike dhe keqpërorim i të drejtës ndërkombëtre.
“Mos të harrojmë se Aleksandar Vuçiq ka qenë ministër për informacion në kohën e Millosheviqit dhe Ivica Daçiq ka qenë zëdhënës i partisë SPS. Pushtetarët serb nuk do t’ia falin kurrë z. Haradinaj, anagazhimin e tij për pavarësinë e Kosovës dhe luftimin e politikës gjenocidale të pushtetit të Millosheviqit. Haradinaj është liruar nga ana e Tribunalit të Hagës, dhe të gjitha pretendimet e Serbisë janë reciklim i atyre akuzave. Ramush Haradinaj do të kthehet.Asgjë s’e ndalë!”, ka shkruar Koci në Facebook.
Në mbështetje të Haradinajt, sot Kuvendi Komunal i Prishtinës miratoi një deklaratë me të cilën shprehet shqetësimi dhe kundërshtimi rreth ndalimit të tij nga Franca.
Haradinaj është arrestuar më 4 janar në aeroportin e Bazelit nga policia franceze me urdhër arrest të Serbisë. /tesheshi.com/
