Meqë jemi në prag të zgjedhjeve të parakohëshme parlamentare, Avokati i popullit, Ixhet Memeti ka bërë apel deri tek të gjithë qytetarët e Maqedonisë që në rast të kërcënimeve të tyre para dhe gjatë ditës së votimeve të paraqiten në numrin falas 0800 54321 tek Avokati i Popullit dhe drejtpërdrejt në zyrat rajonale.
Ai ka premtuar se me efikasitet do të intervenojë në të gjitha rastet e denoncimit të shkeljeve të të drejtave të njeriut, dhe pret që të njëjtën ta bëjnë edhe institucionet tjera kompetente.
Memeti gjithashtu ka kujtuar partitë politike që vetëm nëpërmjet zgjedhjeve të lira dhe demokratike mund të llogaritet që është fituar legjitimiteti i pakontestueshëm i popullit, ndryshe gjithçka do të sanksionohet.
“Secili ka të drejtë të deklarohet për opsionin e tij dhe për këtë të mos vuaj kurrfarë pasoja. Qytetarët janë ata të cilët vendosin. Askush nuk guxon në emër të tyre përmes formave të ndryshme të presionit, shantazhit dhe kërcënimit të vendos. Pikërisht për këtë edhe ju inkurajojë që çdo formë të presionit dhe shkeljes së rregullave ta denonconi menjëherë dhe pa mëdyshje, mes tjerash edhe përmes linjës telefonike falas 0800 54321 tek Avokati i Popullit dhe drejtpërdrejt në zyrat rajonale. Të respektuar qytetarë, mos heshtni, bëjuni aktiv meqë përmes denoncimit e mbroni të drejtën tuaj, ndërsa njëkohësisht kontribuoni në demokratizimin e procesit zgjedhor në tërësi”, ka deklaruar Ixhet Memeti.
Më tej Memeti theksoi nevojën e bashkëpunimit më të madh, para së gjithash të Komisionit Shtetëror të Zgjedhjeve, Ministrisë së Punëve të brendshme dhe institucioneve tjera kompetente, në drejtim të parandalimit të çdo parregullsie- para gjatë dhe pas zgjedhjeve.
/tesheshi,com/
