E pakënaqur me refuzimin e Turqisë për t’i lejuar ligjvënësit gjermanë që ta vizitojnë bazën ajrore të Inxhirlikut, ushtria gjermane po merr në konsideratë largimin e gjashtë avionëve të saj Tornado në këtë bazë.
Der Spiegel ka bërë të ditur një ditë më parë se Bundeswehr-i gjerman po shqyrtonte mundësinë për t’i transferuar avionët në Qipro apo në Jordani. Avionët gjermanë janë në mbështetje të sulmeve ajrore të koalicionit të udhëhequr nga SHBA-të mbi objektivat e ISIS-it.
“Do të donim ta vazhdonim misionin nga Turqia, por ka alternativa për bazën në Inxhirlik,” ka cituar Der Spiegel një zëdhënës të Ministrisë gjermane të Mbrojtjes.
Ata të cilët po këmbëngulin që Gjermania t’i largojë avionët dhe trupat nga baza e Inxhirlikut janë socialdemokratët, partnerët në koalicionin e kancelares Merkel.
“Qeveria gjermane duhet të gjejë menjëherë baza të tjera për ushtarët gjermanë,” është shprehur Rainer Arnold, zëdhënësi i mbrojtjes për socialdemokratët në parlament.
Ai deklaroi se e sheh të pamundur zgjatjen e mandatit parlamentar për misionin ushtarak gjerman në Turqi.
Autoritetet turke nuk i lejuan gjatë kësaj vere disa deputetë gjermanë që ta vizitonin bazën ajrore të Inxhirlikut. Turqia dhe Gjermania po kalojnë një periudhë të tensionuar në marrëdhëniet midis tyre. /tesheshi.com/
