Kur dy vëllezër me kombësi siriane u lejuan muajin e shkuar në një shkollë në Zvicër që të mos i shtrëngojnë duart me mësueset e tyre, kjo u përcoll me një valë reagimesh.
Ata thanë se feja e tyre, Islami, nuk e lejonte kontaktin fizik me një person të gjinisë së kundërt, me përjashtim të anëtarëve të afërt të familjes.
Dhe shkolla, për të shmangur çdo incident, vendosi që t’i përjashtojë nxënësit nga shtrëngimi i duarve me çdo mësues, pavarësisht gjinisë.
Mes atyre që do ta ngrinin zërin për këtë vendim të pavarur të shkollës do të ishte dhe ministrja e Drejtësisë, Simonetta Sommaruga, që do të deklaronte se shtrëngimi i duarve është pjesë e kulturës zviceriane.
Dhe çështjen e morën në duar autoritetet rajonale, që në fund kanë vendosur se nxënësit muslimanë duhet t’i shtrëngojnë duart me mësimdhënësit në fillim e në fund të mësimit.
“Një mësues(e) ka të drejtë të kërkojë një shtrëngim duarsh,” shprehen autoritetet në një njoftim.
Prindërit apo kujdestarët e nxënësve që nuk pranojnë të shtrëngojnë duart me mësimdhënësit e tyre të gjinisë së kundërt mund të gjobiten tani e tutje gjer në 5.000 franga zviceriane. Kështu kanë vendosur autoritetet rajonale në kantonin verior zvicerian Basel-Country.
Babai i dy nxënësve, 14 e 15 vjeç, një imam e shtetas sirian, është vendosur në Zvicër në vitin 2001 dhe ka arritur të marrë azil, por procedura e marrjes së nënshtetësisë për të e për familjen e tij është bllokuar që prej incidentit të muajit të kaluar: /tesheshi.com/
