Një shtetas malazez nga Nikshiqi, Vlada Zmajeviq, i cili është akuzuar për krime ndaj popullatës civile gjatë Luftës së Kosovës në vitin 1999, është arrestuar nga autoritetet e Podgoricës.
47 vjeçari ka qenë pjesë e grupimeve paramilitare serbe që ka operuar në zonën e Gjilanit.
“Me urdhër të prokurorisë speciale shtetërore, pjesëtarët e njësisë speciale të policisë në bashkëpunim me pjesëtarët e Drejtorisë së Policisë në Nikshiq e kanë arrestuar V.Z. me dyshimin e bazuar se ka kryer vepër penale – krime lufte kundër popullsisë civile.
Të dyshuarin në hapësirat e Prokurorisë do ta marrë në pyetje prokurori special, pas të cilit do të merret vendimi për veprim të mëtejmë”, bëhet e ditur në njoftimin e Prokurorisë special të Malit të Zi, të cilin e publikoi gazeta më e madhe e vendit Vijesti.
Drejtori i Fondit për të Drejtën Humanitare në Kosovë, Bekim Blakaj, tha për REL se Vlado Zmajeviq ishte i pari në listë për krimet në Zhegër të Gjilanit.
“Në bazë të dëshmive të dëshmitarëve, më 29 mars 1999, tetë autobusë, sipas të gjitha gjasave, me vullnetarë të Ushtrisë Jugosllave, kanë arritur në fshat dhe kanë vrarë gjashtë persona. Natyrisht, të gjithë civilë të përkatësisë shqiptare, në mesin e të cilëve edhe pleq dhe gra.
Në bazë të asaj që ne posedojmë bëhet fjalë për dy gra dhe katër burra. Banorët e fshatit nuk i kanë njohur kryesit e veprës, por kanë qenë në gjendje të përshkruajnë pamjen, uniformat, megjithëse nuk i kanë njohur ato fytyra”, tha Blakaj. /tesheshi.com/
