Ministri austriak i Mbrojtjes, Hans Peter Doskozil, ka folur për të përditshmen gjermane Die Welt, së cilës i ka bërë të ditur se vendi i tij po planifikon të dislokojë ushtarë në kufirin me Italinë, për t’i dalë përpara një vërshimi të mundshëm të refugjatëve.
I shqetësuar nga mbrojtja e pamjaftueshme e kufijve të jashtëm të BE-së, Doskozil e ka bërë të qartë se do të ketë një kontroll më të rreptë të kufirit me Italinë, qoftë në Brenner, qoftë dhe me ushtarë.
Zyrtari i lartë austriak e ka shpjeguar për gazetën gjermane dislokimin e ushtarëve me ndihmën që ata mund të japin për regjistrimin e emigrantëve ndërsa mbrojnë kufirin, me ndihmën e ofruar prej tyre në aktivitetet humanitare e në deportimet.
Austria druhet se me mbylljen përgjithësisht të rrugës ballkanike të kalimit të emigrantëve, do të hapen rrugë të reja nëpërmjet Shqipërisë dhe Bullgarisë, teksa është rivënë në lëvizje dhe rruga detare nga Libia drejt Italisë.
“Presim përdorim të madh të rrugës mesdhetare në javët në vijim,” ka thënë Doskozil.
Ndërsa Austria, ndryshe Gjermanisë, ka vënë kufizime kufitare, plani për dislokimin e ushtarëve në kufirin me Italinë është një përpjekje e mëtejshme për t’u mbyllur rrugën refugjatëve. /tesheshi.com/
