Fundi i majit do të jetë koha kur do të fillojnë kontrollet e vijueshme kufitare në pikëkalimin mes Austrisë dhe Italisë.
E ka pohuar këtë ministri i Brendshëm austriak, Wolfgang Sobotka, që ka deklaruar gjatë fundjavës se kontrollet kufitare në Brenner janë të domosdoshme për të garantuar sigurinë e Austrisë.
Autoritetet e Vjenës kanë nisur prej javësh ta përforcojnë pikën kufitare të Brenner-it, në pritje të një vale të re refugjatësh.
Sobotka ka paralajmëruar dhe për ngritjen e një gardhi pengues përgjatë kufirit nëse Italia nuk merr masat e duhura në anën tjetër të tij.
Në të njëjtën kohë, Austria ka rinisur dhe kontrollet në kufirin me Hungarinë, për t’i dalë përpara një vërshimi emigrantësh të parregullt.
Sipas policisë austriake, ka një rritje të përpjekjeve për të futur ilegalisht emigrantë në vend që prej mbylljes së rrugës ballkanike.
Kontrollet në kufirin me Hungarinë filluan të hënën, ndërsa nga policia austriake nuk bëhet e ditur koha se sa do të vijojnë ato. /tesheshi.com/
