Atletico Madrid ka shfrytëzuar në maksimum rrëshqitjen e Barcelonës, pasi me fitoren ndaj Athletic Bilbaos (2-1), mbetet në hap me blaugranasit në garën për titullin kampion. Ndërkohë, Real Madrid ka zhgënjyer sërish duke u ndalur në El Madrigal, nga skuadra Villarreal (1-0), duke mbetur kështu pesë pikë prapa kryesuesve.
El Madrigal vazhdon të mbetet terren i vështirë për skuadrat e mëdha. Ndeshja u vendos nga Roberto Soldado që arriti të mposhtë Kaylor Navasin kur doli para tij tek për tek.
Tjetër histori ishte në duelin tjetër ndërmjet Atletico Madrid dhe Athletic Bilbao. Të besuarit e Diego Simeones nuk e përsëritën gabimin e fqinjëve të tyre nga Madridi, duke triumfuar kështu në ndeshjen derbi ndaj Bilbaos, megjithëse me mjaft vështirësi.
Në fakt, duelin më mirë e nisën “luanët” që përmes Laportes kalojnë në epërsi. Fundi i pjesës së parë ishte me fat për kuqebardhët që barazuan rezultatin përmes Saul. Në fraksionin e dytë të lojës, ishte një goditje e fuqishme e Griezman që përmbysi gjithçka.
Kampionati spanjoll tani udhëhiqet nga Barcelona dhe Atletico Madrid që kanë nga 35 pikë, ndërkohë Real Madrid mbetet prapa me 30 pikë. /tesheshi.com/
