Athina ka mobilizuar strukturat e minoritetit grek në Shqipëri që të kundërshtojnë reformën në Drejtësi.
Përveç Vangjel Dules, i cili është instruktuar në mënyrë të qartë nga Greqia që të bëjë aleancë me opozitën sa kohë që Edi Rama ka aleancë me Shpëtim Idrizin, edhe deputetët e tjerë majtas e djathtas që janë nën influencën greke janë këshilluar që të mos e votojnë reformën në Drejtësi.
Burime diplomatike bëjnë të ditur se Berlini i ka “tërhequr” veshin Greqisë për një ndikim kundër reformës, ndërkohë kur të gjithë vendet e BE-së janë bashkuar që të ndikojnë kalimin e saj sa më shpejt.
Madje në takimet që ambasadorët e vendeve të Bashkimit Europian në Tiranë kanë zhvilluar me njëri-tjetrin, nuk ka marrë pjesë ambasadori i Greqisë në Tiranë, Leonidas Rokanas.
E paralel me këtë zhvillim, vetëm pak ditë më parë, ambasadori Rokanas është dekoruar nga Presidenti i Republikës, Bujar Nishani me medaljen e lartë “për Merita Civile”.
Por nuk dihen se cilat janë “meritat civile” që ka pasur ambasadori grek në Tiranë, aq më shumë që ky i fundit ka pasur përplasje të vazhdueshme për çështjen e Himarës, kur militantë të Agimit të Artë kanë kërcënuar integritetin territorial të Shqipërisë, duke e quajtur qytetin buzë Jonit të Rivierës shqiptare si pjesë të Vorio Epirit.
Në njoftimin e Presidentit për këtë çështje theksohet se: “Kreu i Shtetit Bujar Nishani vlerësoi me Titullin “Për Merita të Veçanta Civile”, Ambasadorin e Republikës Helenike, Leonidas C. Rokanas, me motivacionin: “Në vlerësim të veprimtarisë diplomatike dhe kontributit të çmuar në avancimin e gjithanshëm të marrëdhënieve dypalëshe mes Republikës së Shqipërisë dhe Republikës Helenike; mbështetjen e pakursyer të procesit të integrimit evropian të vendit, si dhe për forcimin dhe pasurimin e mëtejshëm të marrëdhënieve miqësore mes dy popujve tanë fqinj”.
Në ceremoninë e zhvilluar në Presidencë nuk mori pjesë ministri i Jashtëm Ditmir Bushati, i cili bojkotoi takimin, dhe as ndonjë përfaqësues tjetër i PS-së.
Bëri përshtypje se nga mazhoranca ka qenë prezent kreu i Kuvenditm Ilir Meta dhe ministrja e LSI-së në qeveri, Klajda Gjosha.
Presidenti i Republikës është konfiktuar fort me qeverinë e në veçanti me PS-në, për çështjen e reformës në Drejtësi, të cilën e quan si “kapje e drejtësisë nga mazhoranca”.
Ceremonia në Presidencë ka alarmuar diplomatët dhe në event ka qenë prezent edhe ambasadori i SHBA-së, Donald Lu si dhe kolegja e tij e BE-së, Romana Vllahutin.
Ditët e fundit ka pasur një takim të ambasadorit grek në Tiranë me Fredi Berberin, kandidatin e PBDNJ-së për bashkinë e Himarës dhe me tre deputetë të parlamentit shqiptar, të cilët kanë shtetësi greke pikërisht për votën e reformës.
Këta deputetë janë Andrea Marto, Anastas Angeli dhe Vangjel Dule.
Nëse miratohet, Athina nuk mundet dot të kontestojë direkt hapjen e negociatave për Shqipërinë, pasi do të konfliktohej me Gjermaninë e cila po e mbështet këtë proces.
Ndërkohë, nëse dështon miratimi i reformës atëherë negociatat do të bllokohen përfundimisht.
Por dekorimi në Presidencë i ambasadori grek ka shkaktuar çudi edhe nga qeveria, pasi kjo bëhet jo me propozimin e Ministrisë së Jashtme, gjë që nddh normalisht dhe as nga ndonjë kërkesë qeverie.
Dekorimi vetëm nga Kreu i Shtetit e ka kthyer Presidencën në këtë rast në një pol pushteti edhe në lidhje paralele diplomatike;
pasi politika e jashtme është çështje e unifikimit kombëtar dhe nuk ndodh në asnjë vend që Presidenti dhe Qeveria, apo institucione të tjera, të kenë qëndrime të ndryshme për politikën e jashtme.
Sa për analogji, asnjë ambasador shqiptar në Athinë nuk është dekoruar nga Presidenti i Republikës së Greqisë.
Ka ndodhur në fakt me ish-ambasadorin Bashkim Zeneli, që në 2004-ën mori një medalje nga kryetarja e Bashkisë së Athinës, Dora Bakojanis, që iu dha në emër të kontributit që bënë shqiptarët në ndërtimin e infrastrukturës së Olimpiadës së 2004-ës dhe për t`u treguar në prag të këtij eventi se Greqia është shtet që respekton fqinjët. Thjesht një medalje dhe krejt e motivuar. Por dekorime në nivele kaq të larta si ky i Nishanit ndaj një ambasadori, aq më tepër grek dhe pa ndonjë kontribut konkret të dukshëm, nuk kanë ndodhur asnjëherë. /tesheshi.com/
