Astrit Patozi fshikullon Edi Ramën dhe Ilir Metën, por më shumë partinë e tij dhe veçanërisht ata që janë kundër reformës në Drejtësi.
Në një fjalim në Kuvend, Patozi tha se nuk mund të krahasohet protesta e 18 shkurtit me atë të Rumanisë pasi në atje dalin pro reformës në Drejtësi ndërsa këtu janë kundër. Por fillimisht, Pazoti u përqëndrua në atë që po ndodh në radhët e mazhorancës.
“Nuk ka njeri të besojë se Rama dhe Meta po zihen për çështje parimesh apo doktrine.
A është normale kur gjysma e qeverisë punon kundër gjysmës tjetër?
Përplasja nuk bëhet për probleme që me të vërtetë shqetësojnë Shqipërinë, si për shëndetësinë falas të Ilir Beqjas, për kanabisin e Tahirit, apo për Edi Ramën që del kudo.
Kjo qeveri ka rënë. Dy partnerët qeverisë po përplasen për t’i ngrënë kokën njëri-tjetrit.
Si t’i quajmë ministrat që denoncojnë kolegët e tyre në qeveri si trafikantë, hajdutë e përdhunues? Kjo është e vetmja në botë. Por megjithatë nuk i pengon të dy ‘padrinot’ të thonë se koalicioni funksionon”, deklaroi Patozi.
Por më tej në fjalën e tij, ai ka kritikuar edhe protestën e paralajmëruar nga opozita, e cila është krahasuar me atë të qytetarëve në Rumani.
“Ka shumë që e lidhin protestën e 18 shkurtit me protestën në Rumani, ndërsa qeveria dhe zërat afër saj thonë se nuk mund të ketë ngjashmëri mes dy vendeve. Mund të ngjajë paradoks, por unë jam me të dytët. E mendoj këtë sepse ne jemi shumë më mbrapa se Rumania. Në Rumani po protestohet kundër zbutjes së reformës në drejtësi, ndërsa këtu po punohet për ta penguar reformën”, theksoi Patozi.
“Rama kërkon ta rrëmbejë drejtësinë, ndërsa Meta ta mbajë kështu siç është. Kjo qeveri nuk njeh gjë tjetër veç numrave. Sali Berisha shpiku Shqipërinë Dixhitale, këta po e zbatojnë”, tha më tej në fjalën e tij deputeti democrat, ish-nënkryetar i PD-së por tashmë i mënjanuar disi nga partia e tij. /tesheshi.com/
