Dy punëtorë të Kompanisë ‘RDS’ nga qyteti i Borit të Serbisë, dyshohet se kanë vdekur nga asfiksimi në një tunel në fshatin Jegenicë të Komunës së Zubin Potokut, kanë njoftuar burime të portalit tesheshi.com
Vdekjen e dy punëtorëve në tunelin që shërben për kalimin e gypave të ujësjellësit në fshatin Jegenicë e ka konfirmuar edhe policia e Kosovës.
Zëvendësdrejtori i Policisë së Kosovës për rajonin veri Besim Hoti ka theksuar se “dy persona kanë vdekur në tunelin që është në ndërtim e sipër në fshatin Jegenicë të Komunës së Zubin Potokut”.
“Incidenti rënd i vdekjes së dy personave të nacionalitetit serb ka ndodhur të mërkurën rreth orës 20:00, deri sa ata ishin duke punuar”, ka thënë Hoti dhe ka shtuar se “të ndjerët kanë qenë në një thellësi të tunelit prej rreth 150 m, dhe sipas hetimeve të parë dyshohet se deri tek vdekja ka ardhur nga gazrat që janë lëshuar nga gjeneratori pasiqë tek viktimat nuk janë vërejtur shenja dhune”.
Sipas tij, viktimat janë nxjerr nga tuneli të enjten në orët e mëngjesit nga ana e njësisë së zjarrfikësve e cila ka dal në vendin e ngjarjes me pajisje dhe ka bërë të mundur nxjerrjen e kufomave.
Hoti ka shtuar se “ekipet mjekësore dhe policia që ka dalë në vendin e ngjarjes dhe kanë konstatuar vdekjen e dy personave, ndërsa që me urdhër të Prokurorit, viktimat do të dërgohen në Institutin mjekësisë ligjore në Prishtinë.
Policia e Kosovës ka filluar hetimet rreth vdekjes së këtyre dy personave, e që dyshohet se kanë qenë në punë, por të pa pajisur me mjetet e punës adekuate ka thënë Hoti.
Policia e Kosovës nuk ka bërë të dituar identitetin e viktimave ndërsa që ka shtuar se bëhet fjale për dy punëtorë të nacionaliteti serb.
Në anën tjetër burime të portalit tesheshi.com nga vendi i ngjarjes kanë theksuar se “njëri nga të vdekurit është Nemanja Kasalloviq nga fshati Zupq i Komunës së Zubin Potokut, ndërsa i vdekuri tjetër është një shtetas i Serbisë nga qyteti i Borit”.
“Dy të ndjerët kanë qenë duke punuar për kompaninë ‘RSD’ nga Bori dhe si Dimanik Trade nga Zvecanit, në projektin e Shtetit të Serbisë për ndërtimin e Ujësjellësit të ri për Komunat Zubin Potok, Zveçan dhe Mitrovicë të veriut” ka thënë burimi i portalit tesheshi.com.
Këtë projekt e ka iniciuar Shteti i Serbisë përmes ish Ministrit Serb për Kosovë në Qeverinë e Serbisë Goran Bogdanoviq, në vitin 2011 e që ka një vlerë prej mbi 30 milion euro.
Burimi ka shtuar se punëtorët që kanë qenë të angazhuar në ndërtimin e këtij tuneli të gjatë mbi 200 m, në vendin e quajtur Bulanovac e që gjendet në afërsi të fshatit Jegenicë, kanë punuar pa pajisje të nevojshme për hapjen e tuneleve.
“Dy kompanitë nuk kanë as leje pune për të punuar në territorin e Kosovës dhe ky incident i rëndë që për pasoj ka vdekjen e dy punëtorëve dyshohet të ketë ndodhur për neglizhencë të pronarëve të kompanive, të cilët nuk iu kanë siguruar mjete e duhura për punë”, ka thënë burimi i portalit tesheshi.com.
