Për të parën herë në historinë politike të 25 viteve tranzicion një zyrtar në detyrë nuk pranon të rikandidojë. Bëhet fjalë për Artan Shkëmbin, kryetar i bashkisë së Pogradecit, i cili ka tre mandate në krye të pushtetit vendor të qytetit liqenor të juglindjes së vendin.
Shkëmbi u shpreh se nuk do të kandidojë në zgjedhjet e ardhshme lokale dhe as nuk do të inlfuencojë në zgjedhjet lokale që do të mbahen në qershor.
Duke falënderuar të gjithë qytetarët që e kanë votuar, si dhe Partinë Socialiste për mbështetjen, kreu i Bashkisë së Pogradecit, tha se dorëheqjen do të ia paraqes me shkrim edhe Kryeministrit Edi Rama.
“Zgjodha këtë dite sot për t’ju thëne të gjithëve se unë do t’i paraqes dorëheqjen time nga detyra Kryeministrit Edi Rama. Sepse dua ta lë tërësisht të lirë rrugën për zgjedhjen e një kandidati apo kandidateje të re për të vazhduar punën time. Nuk dua të pengoj dhe as të influencoj në këtë zgjedhje të rëndësishme, aq më tepër në kushtet kur pas riorganizimit territorial bashkia e re ka një hapësirë shumë më të madhe përgjegjësie dhe sfidash për të përballuar. Jo vetëm s’kemi lindur për t’u plakur në karriget ku na kanë ulur të tjerët, por kemi detyrimin t’ia kthejmë familjes sonë politike investimin e bërë për ne, me gatishmërinë për të vazhduar t’i shërbejmë qoftë edhe si komisionerë të thjeshtë në zgjedhje.” theksoi në fjalën e tij Artan Shkëmbi.(tesheshi.com)
