Pas mbylljes së takimit 40 minutësh në Rogner – hotel që përdoret për takime diplomatike – me Sekretarin Amerikan të Shtetit, John Kerry, Lulzim Basha e pa konkretisht se imazhi i partisë së tij në sytë e Uashingtonit zyrtar ishte ridimensionuar.
Kjo, edhe nga lufta e hapur e disa deputetëve të PD-së, përfshirë edhe Sali Berishën me ambasadorët e SHBA-së në Tiranë, Withers, Arvizu e Donald Lu.
Ndaj, kryetari i Partisë Demokratike lëvizi fuqishëm dhe përsëriti të njëjtin veprim që bëri në vitin 2011: i telefonoi Tony Podesta-s, një prej lobistëve më të mëdhenj në Uashington dhe i kërkoi që të rinisin bashkëpunimin e shkëputur tre vjet më parë kur humbën zgjedhjet e 2013-ës.
Partisë Demokratike i duhet më shumë se gjithçka një imazh i rregulluar ndërkombëtar. Dhe në mos sot, të paktën për 2017-ën, atëherë kur mendohet se janë pjekur kushtet për të menduar një alternativë qeverisëse të Partisë Demokratike.
Por pse Basha zgjodhi sërish Podesta-n dhe cili është qëllimi i tij politik?
Në fakt, kreu i ri i PD-së, të cilit ia njohin shumë aftësitë e spikatura me interlokutorët ndërkombëtarë, e ka menduar mirë skemën.
E cila është e thjeshtë: John Podesta, vëllai i Tony Podesta-s është truri i fushatës elektorale të Hillary Clinton, përkatësisht shefi i stafit të saj, njeriu më i rëndësishëm dhe i besuar. Nëse Hillary zgjidhet presidente e SHBA-së, gjë që ka mjaft gjasa, Podesta bëhet personi më i pushtetshëm pas Clinton-it në Shtëpinë e Bardhë.
Me Billin ka qenë shef i kabinetit, me të shoqen nëse i dhuron fitoren do të jetë diçka më shumë, ndoshta edhe Sekretar Shteti.
Dhe në këtë rast, Lulzim Basha fiton një njeri të çmuar në Uashington që do t’i japë “bekimin” politik të SHBA-së për t’u rikthyer në qeverisje; gjë që Basha pritet ta bëjë padyshim pasi të miratojë reformën në drejtësi që amerikanët e kërkojnë me ngulm.
Por faktikisht, Uashingtoni i kërkon një “kokë turku” brenda PD-së nga ish-qeveritarët. Dhe në këtë rast Bashës i nevojitet një operacion i dhimbshëm por i domosdoshëm.
Kontrata e Partisë Demokratike me Podesta Group është nënshkruar 8 mars 2016; ndërkaq, kryetari i PD-së, Lulzim Basha është nisur për një vizitë zyrtare në SHBA.
Basha pritet të takohet në Departamentin e Shtetit dhe Kongres me aktorë shumë të rëndësishëm të politikës së Uashingtonit.
Pikërisht këtu hyn në lohë Podesta, si për t’i gjetur ndonjë “peshk të madh” politik për të takuar, por edhe për të folur mirë për selinë blu.
Podesta u pajtua nga PD-ja për zgjedhjet e vitit 2011 deri në vitin 2013, me një tarifë prej 60 mijë dollarësh në muaj, të cilat u paguan me paratë e taksapaguesve shqiptarë.
Zyrtarisht, Podesta duhej të lobonte për përmirësimin e marrëdhënieve politike mes qeverive të të dy vendeve.
Në fakt, kjo kompani u përdor shpesh për të sulmuar Edi Ramën në median e SHBA në mënyrë që të rrëzohej imazhi i tij për t’ja vështirësuar ardhjen në pushtet.
Edhe LSI-ja e Ilir Metës, së fundmi punësoi kompaninë Global Security and Innovative Strategies LLC, GSIS, me një faturë mujore prej 30 mijë dollarësh.
Qëllimi i kësaj kontrate sipas dokumenteve të bëra publike nga Departamenti i Drejtësisë në SHBA, është “edukimi i qeverisë amerikane dhe zyrtarëve të saj nëpërmjet kontakteve dhe komunikimit në lidhje me zotimin e LSI për implementimin e reformës në drejtësi.”
Përgatiti: Ylli Pata – /tesheshi.com/
