Ekipet e kampionatit anglez u rikthyen rishtas në fushë të martën, çka do ta bëjnë dhe ditën e sotme, për të luajtur javën e 16-të.
“Topçinjve” u iku mbrëmë një mundësi e mirë për ta marrë kryesimin e Premier League-s. Në “Goodison Park” ata pësuan humbjen e dytë në kampionat.
Evertoni triumfoi 2-1 ndaj Arsenalit, ndërsa nuk e provonte shijen e fitores që nga tetori.
Qe Arsenali që do të kalonte i pari në epërsi; Alexis Sanchez do të shënonte në pjesën e parë të lojës. Coleman vuri barazpeshën pak përpara se ekipet të ktheheshin në dhomat e zhveshjes për pushimin midis dy pjesëve. Goli i fitores për vendasit erdhi në minutën e 86-të, kur shënoi një tjetër mbrojtës, Williams.
Arsenali mban pozitën e dytë në klasifikim, me tre pikë më pak se Çelsi, që do të luajë sonte në transfertë ndaj Sandërlendit.
Kampionët e Anglisë nuk fitojnë dy ndeshje të njëpasnjëshme që prej muajit prill. Lestër Siti provoi kulmin të shtunën, kur fitoi thellë ndaj Mançester Sitit, por u përplas pas tre ditësh në tokë, duke humbur ndaj Bornmëthit.
Ky ishte takimi i dytë i mbrëmjes së një dite më parë. Bornmëthi fitoi 1-0 falë një goli të shënuar në minutën e 34-t nga Pugh.
Lojtarët e Lestërit patën një seri rastesh, por që nuk u konkretizuan asnjëherë, edhe për shkak të pritjeve të portierit kundërshtar, polakur Artur Boruc.
Vetëm katër pikë e ndajnë Lestër Sitin nga zona e rënies një kategori më poshtë. Kjo ishte humbja e tetë në 16 javë kampionat. /tesheshi.com/
