Topçinjtë e Londrës e duan me çdo kusht qendërmbrojtësin e Valencias përpara se të nisë në fundjavë kampionati anglez.
Lojtari me origjinë shqiptare është kthyer në objektivin kryesor të Arsenalit, e posaçërisht të Arsene Venger-it.
Dëmtimet e Mertesacker-it dhe të Paulista-s e kanë vënë në vështirësi trajnerin francez, që kërkon t’i mbyllë mungesat me Mustafi-n.
Romanisti Kostas Manolas dhe napolitani Kalidou Koulibaly janë gjithashtu në listën e Venger-it, por ai duket më i prirur nga mbrojtësi i kombëtares gjermane, i cili luan prej dy vitesh në Spanjë.
Gjatë ditëve në vazhdim pritet të ketë një ofertë, teksa synohet që marrëveshja të arrihet para ndeshjes të së dielës midis Arsenalit dhe Liverpulit.
Sipas rregullave të Premier League-s, vetëm lojtarët që kanë nënshkruar dhe janë regjistruar para orës 12:00 të së premtes mund të luajnë në takimet e kësaj fundjave, duke e bërë kështu të ngutshme përshpejtimin e negociatave mes palëve. /tesheshi.com/
