Është arrestuar sot gruaja e të dyshuarit të sulmit terrorist në klubin e natës “Reina” në Stamboll.
Lajmi është bërë i ditur nga korrespondentja e ITV News në Stamboll, Sally Lockwood në një postim në twitter.
Ndërkohë, autoritetet turke thonë se janë duke bërë përparim në identifikimin e atentatorit, i cili ende gjendet në arrati.
Media të tjera bëjnë të ditur se ai është një ujgur.
Ndërkohë sipas të përditshmes turke HaberTurk, gruaja është arrestuar në provincën konservatore të Konya, në Turqinë qendrore, ku autori së bashku me dy fëmijët e tij jetonte prej nëntorit, pasi kishte ardhur nga Kirgistani.
Burimet e cituara nga media turke bëjnë të ditur se bëhet fjalë për një ujgur me origjinë nga rajoni kinez i Xinjiang, shkruan Ansa.
“Për sulmin e mësova nga televizori. Nuk e dija që bashkëshorti im ishte simpatizant i ISIS”, mësohet të ketë thënë gruaja në polici citon HaberTurk.
Për momentin policia është e rezervuar lidhur me identitetin e atentatorit, i identifikuar si anëtar i një minorance myslimane turkofone e ujgurëve me origjinë nga rajoni kinez i Xinjiang.
Sulmin e ndodhur në klubin e natës në Stamboll natën e ndërrimit të viteve ku mbetën të vrarë 39 persona, 25 prej tyre shtetas të huaj, e mori përsipër ISIS. /tesheshi.com/
