Policia serbe ka arrestuar dy persona në fshatin Llaush të Podujevës, saktësisht në brezin kufitar Kosovë-Serbi.
Arrestimin e tyre e ka konfirmuar zëdhënësi i policisë, Baki Kelani i cili ka bërë të ditur se arrestimi ka ndodhur të mërkurën saktësisht në ora 18:45, në brezin kufitar në mes të Kosovës dhe Serbisë.
“Informacioni i pranuar nga Policia e Kosovës ka të bëjë fillimisht me arrestimin e një personi, e më pastaj edhe arrestimin e personit të dytë (m/sh/k) nga autoritet policore serbe. Sipas informacioneve të deritanishme personave të arrestuar iu janë konfiskuar edhe mjetet/traktorët e tyre”, ka thënë Kelani për “Indeksonline”.
Ai ka bërë të ditur se policia është duke e trajtuar këtë informacion/rast përmes kanaleve zyrtare.
Megjithatë vlen të theksohet se qeveria ka heshtur për këtë rast, pasi as kryeministri Haradinaj e as ministri i Drejtësisë, Abelard Tahiri nuk kanë folur për arrestimin e dy qytetarëve në konferencën për media që mbajtën sot. /tesheshi.com/
