Kryeministri i Kosovës, Ramush Haradinaj, ka shkarkuar ministrin e Punëve të Brendshme, Flamur Sefaj dhe kreun e Agjencisë Kosovare për Inteligjencë, Driton Gashi. Vendimi vjen pas operacionit të policisë dhe shërbimeve sekrete për deportimin e gjashtë shtetasve turq që jetonin dhe punonin në Kosovë, drejt Turqisë.
Përmes një shkrese zyrtare dërguar dy krerëve të institucioneve Haradinaj shkruan se nuk ka qenë i informuar lidhur me këtë operacion
“Dua edhe njëherë të potencoj se veprimet e djeshme në këtë rast ishin tërësisht të papranueshme dhe në kundërshtim me vlerat dhe parimet tona si popull dhe si shtet. Duke marrë parasysh se si kryeministër i Republikës nuk kam qenë paraprakisht apo me kohë i informuar nga Ministria që ju drejtoni, kërkoj nga ju: lirimin e menjëhershëm nga përgjegjësia e ministrit të Punëve të Brendshme të Republikës së Kosovës”, thuhet në dokumentin e Haradinajt drejtuar ministrit të Brendshëm.
Kërkesa e Haradinajt ka efekt të menjëhershëm. /tesheshi.com/
