Në hapje të kongresit të FIFA-s, Sep Blatter e ka quajtur të paprecedent skandalin e shpërthyer, por nuk ka lënë të kuptohet se është i gatshëm të japë dorëheqjen. Mes fjalëve të tij dukej vullneti për të vazhduar punën, e nuk perceptohej asnjë shenjë lëkundjeje, “Eshtë e nevojshme të rikthejmë besimin në organizatën tonë. Le të jetë kjo pika e kthesës. Nesër kongresi ka rastin të nisë rrugën e gjatë e të vështirë për rëndërtimin e besimit. Unë nuk do të lejoj që veprimet e një numri të vogël njerëzish të shkatërrojnë aksionet e atyre që punojnë aq fort për futbollin.”
Organi qeverisës botëror i futbollit është në kohët e tij më të trazuara, ndërsa një hetim i udhëhequr nga FBI-ja amerikane u kurorëzua të mërkurën me ndalimin e shtatë zyrtarëve të lartë me akuzat për korrupsion dhe ryshfet, të pasuar më tej me një urdhër për presidentin e FIFA-s për të mos u largua nga vendi. E tëra kjo ka ndodhur vetëm pak para kongresit të FIFA-s, ku do të zgjidhet dhe drejtuesi i ri i këtij institucioni.
Një numër personalitetesh të futbollit, ku spikat Michel Platini, presidenti i UEFA-s, i kanë kërkuar Blatter-it të japë dorëheqjen, e të mos kandidojë më për një mandat të pestë.
Platini e ka bërë të qartë se do të votojë kundër kandidaturës së Blatter-it, e këtë gjë shpresonte që ta bënin dhe 45 apo 46 vende të Europës. Fjala e tij në një takim të jashtëzakonshëm dje kishte nota emocionale, të përmbledhura në fjalët, “Nëse unë nuk mund t’i them atij (Blatter-it) se është koha për të ndaluar, atëherë kush mund t’i thotë? Një mik i vërtetë mund t’ia tregojë realitetin mikut tjetër.”
Ish-lojtari i madh francez e ka shprehur po ashtu pëlqimin për kandidaturën tjetër për kreun e FIFA-s, princin jordanez, Ali bin Al Hussein, “Princi Ali ka gjithë legjitimitetin që i duhet, është i ri, është ambicioz. Ai mund t’i ndryshojë gjërat, ai nuk ka nevojë për para, sepse është princ.”
Ngjarjet kanë marrë nota politike, ku bie në sy reagimi i Vladimir Putin-it, presidentit rus, që i ka quajtur ato një përpjekje për të bllokuar rizgjedhjen e Blatter-it si president i FIFA-s. “Kjo është një shkelje tejet serioze e parimeve të funksionimit të një organizate ndërkombëtare.” Putini theksoi në komentet e tij të transmetuara në televizion se kjo është një përpjekje e qartë për ta shtrirë juridiksionin e Uashingtonit në vendet e tjera.
Sot FIFA zhvillon zgjedhjet për kreun e ri të saj. 209 anëtarët do të votojnë për njërin nga kandidatët, për Sep Blatter-in apo Ali bin Al Hussein-in, dhe për t’u shpallur fitues në votimin e parë duhen dy të tretat e votave. /tesheshi.com/
