Policia franceze anti-terrorizëm arrestoi 10 anëtarë ekstremistë, për të cilët mediat njoftojnë se akuzohen për planifikim të sulmeve ndaj politikanëve francezë dhe xhamive.
Ata janë djem të rinj dhe një vajzë, të moshës midis 17 dhe 25 vjeç, të cilët u arrestuan në Seine-Saint-Denis, në veri të Parisit dhe në Marsejë në jug të vendit, njoftojnë të martën agjencitë e lajmeve duke cituar burimet e gjykatës.
Zyrtari i gjykatës nuk ka dashur të zbulojë arsyet për arrestimin, por stacioni televiziv M6 njoftoi se ata u arrestuan për planifikim të sulmeve ndaj politikanëve dhe objekteve fetare muslimane.
Sipas agjencisë AFP, e cila u referohet burimeve anonime të afërta me hetimet, zëdhënësi i qeverisë franceze Christophe Castaner dhe Jean-Luc Melenchon, udhëheqës i së majtës radikale, ishin gjithashtu në shënjestër të tyre.
Ata dyshohen për lidhjet me Logan Alexandre Nisin, një ish-anëtar i grupit të ekstremit të djathtë të grupit francez të arrestuar në qershor, konfirmoi një burim të paidentifikuar për AFP.
Ai u arrestua pasi publikoi mesazhe kërcënuese në rrjetet sociale kundër emigrantëve dhe anëtarëve të grupeve që kishin organizuar sulme nëpër Francë.
Autoritetet gjithashtu dyshojnë se të dyshuarit, të cilët janë në paraburgim për “shkak të shoqërimit me individë terroristë”, kanë përgatitur një komplot për të sulmuar emigrantët dhe xhamitë.
“Ata ishin vetëm në fazat fillestare të planifikimit”, tha një nga burimet e paidentifikuara të agjencisë franceze. /tesheshi.com/
